A partir das dúas da madrugada desatouse a furia, e durante catro horas, o ceo da provincia de Lugo e da próxima comarca do Bierzo ofreceu un espectáculo de luz e son que, por fortuna, non ocasionou danos persoais. Entre estas dúas zonas, máis de 2.500 raios foron captados polos detectores da Xunta de Galicia. Como consecuencia desta actividade excepcional, un deles impactou nunha vivenda de Castro, ocasionando un pequeno lume.
Segundo informou a Axencia Galega de Emerxencias (Axega), o incendio comezou ás tres da madrugada, na parte baixa dunha casa do Mosteiro Vello. Fontes do 112 confirmaron que bastou con pechar a porta da estancia para sufocar as lapas e non houbo consecuencias meirandes.
Catedral de Lugo + tormenta eléctrica #miedito pic.twitter.com/GQEyNOfKue
— Iria Golmar (@IriaGolmar) 5 de setembro de 2018
Durante a noite chegou a caer granizo nos Ancares. O servizo MeteoGalicia advirte de que a previsión é que continúe a inestabilidade, polo que se contabilizarán máis raios durante a xornada. Continúa o aviso amarelo na Montaña lucense.
Son catro días consecutivos con aparato eléctrico na rexión, con especial impacto no centro e sur da provincia de Lugo e no corazón do Bierzo.
