Un home foi trasladado na mañá deste martes a un centro hospitalario despois de recibir unha couce dunha vaca no concello lucense de Ribeira de Piquín. Segundo informou o 112 Galicia, o servizo de emerxencia tivo constancia dos feitos a través da chamada dun particular poucos minutos antes das 10,00 horas.
Na comunicación, a persoa solicitou asistencia médica para un home que acababa de resultar ferido polo golpe dun animal, no lugar de Barangón, na parroquia de Santalla. Por iso, os operadores do CIAE-112 Galicia informaron os servizos sanitarios, aos axentes da Garda Civil e aos membros de Protección Civil da localidade.
Finalmente, a Garda Civil indicoulle ao 112 Galicia que o home foi trasladado ao Hospital Universitario Lucus Augusti (HULA) de Lugo, sinalaron as mesmas fontes.
