O Concello de Lugo tomou a decisión de anular a acometida central de auga da rúa Armórica, primeiro paso para solventar o escape de auga na rede de abastecemento. O servizo está garantido coa derivación á canle paralela, que pasa baixo unha das marxes.

Este corte na acometida servirá para atallar a fuga, traballo que está previsto que remate na tarde deste luns. O concelleiro de Infraestruturas, Manuel Núñez, supervisou estas tarefas, ás que seguirán nos vindeiros días o peche das gabias e o asfaltado da zona afectada.

Durante a reparación a acometida principal da rúa Armórica quedará anulada, mais como confirmou o goberno local, a traída da beirarrúa ten capacidade abondo para solventar o abastecemento cotián.