O presidente da asociación provincial de hostaleiros de Lugo, Cheché Real, mostrouse confiado en que o regreso do consumo nas barras dos establecementos hostaleiros sexa “en breve”. “Necesitamos traballar nas barras despois de máis dun ano sen poder facelo“, remarcou.
Á espera de como se pechará o protocolo de uso das barras, o responsable da entidade provincial puntualizou que “as novas medidas nas que traballa a Xunta co sector, non serían necesarias se o Tribunal Superior de Xustiza de Galicia (TSXG) permitise a petición do certificado covid para entrar nos locais”.
“O dano que se lle fixo á hostalaría foi tremendo. Na miña opinión, nesta situación, son as autoridades sanitarias quen teñen que levar as rendas; non as xuristas”, criticou.
A Xunta prepara novas fórmulas para evitar os sobe e baixa nas restricións que sofren os locais. Mentres espera coñecer o resultado do recurso presentado ante o TSXG sobre o certificado de vacinación. “Insistímoslle á Xunta que armase ben ese recurso. Hai unha gran porcentaxe de xente xa vacinada. Ninguén está libre de ser infectado, pero é outra seguridade”, subliñou Cheché Real.
Entre as opcións que barallan, estudan que as restricións non dependan do nivel de contagios, se non da seguridade que ofrece o establecemento. “Propuxémolo buscando as mellores opcións para poder chegar a fin de mes”, destacou.
CONCURSO DE TAPAS
Cheché Real participou este luns na presentación dunha nova edición do concurso de tapas da cidade de Lugo, que se traslada ao mes de novembro (entre o 5 e o 21).
“Démonos conta de que hai que pór en marcha a maquinaria do turismo e a gastronomía. Un exemplo é o concurso de tapas de Lugo; virán máis. Esperemos que a situación sanitaria continúe mellorando e podamos celebralos”, informou.
