O decano do colexio de avogados de Lugo, Félix Mondelo, reclamou un sexto xulgado de primeira instancia ante a avalancha de casos que fan que, dos cinco que funcionan na cidade, o número un acumule ata un ano para ditar resolucións.
Mondelo apelou á existencia dun número de casos que xustifica a necesidade de creación deste xulgado e engade que “encima os órganos xudiciais tamén o avalan porque o Consello Xeral do Poder Xudicial acaba de designar un xuíz que se repartirá polos distintos xulgados de primeira instancia para eliminar os problemas”.
Sobre todo, pon o acento nas dificultades que se rexistran no xulgado número un de primeira instancia, á vez que denuncia que “hai dous maxistrados de primeira instancia que están a facer labores de maxistrados na Audiencia Provincial”. É precisamente este xulgado, segundo o decano, o “máis atrasado, porque o titular do xulgado número un de primeira instancia está de baixa desde hai tempo”.
“Estiveron a buscarse distintas solucións, tróuxose un xuíz de Vigo porque había problemas de atrasos de ata un ano en resolucións xudiciais. Nos demais non hai tanto atraso, pero o traballo acumúlase e para evitar máis atrasos é polo que o Consello Xeral do Poder Xudicial nomeou un maxistrado de reforzo”, puntualizou.
Insiste Félix Mondelo en que a petición está avalada porque “os números de procedementos para que haxa outro novo xulgado danse”. “Non inventamos nada”, resolve o decano dos avogados de Lugo.
