O Concello de Lugo segue avanzando nas obras para “humanizar” a contorna da muralla romana e así “protexer” o monumento máis icónico da cidade lucense. Así o vén de anuncian o consistorio tras a finalización das obras para construír beirarrúas nun tramo da Ronda da Muralla ; en particular o que decorre entre a rúa Santiago e rúa Vilalba.
As obras foron visitadas polo tenente de alcalde Rubén Arroxo e o responsable da área de Mobilidade Alexandre Penas. Arroxo destacou in situ a finalización das obras da beirrarúa, que logo continuarán co resto de actuación contempladas no proxecto para “humanizar” a contorna da milenaria construción.
Á parte, e segundo destacou o tenente de alcalde, as obras futuras servirán para protexer a muralla, xa que parte dos obxectivos desta intervención pasa por reducir as vibracións producidas polos vehículos a motor; circunstancia que iría encamiñada a seguir as recomendacións de voces expertas para garantir o mantemento da muralla.
NOVA ILUMINACIÓN
Do mesmo xeito, o Concello informa que a área de Mobilidade e Infraestruturas instalará nove novas luminarias LED tipo RGB na zona para emitir un brillo adecuado ás distintas horas e á luminosidade do momento. “O alumeado permitirá variar a luminosidade do monumento segundo a hora do día, mostrando luces de tonalidade cálida na noite e luz fría durante as mañás, o que mellorará a percepción visual do monumento”, destacan.
