A Deputación Provincial apoia a contratación dun intérprete de lingua de signos na Asociación de Persoas Xordas de Lugo (Asorlu) con 23.000 euros.
O presidente da institución provincial, José Tomé Roca, e o seu homólogo na asociación, Daniel Lourés Ferro, asinaron un convenio de colaboración que permitirá que a Deputación Provincial achegue 23.000 euros para contribuír a eliminar barreiras de comunicación dos usuarios do servizo. Así, poderase contratar un intérprete de lingua de signos a xornada completa durante este ano.
José Tomé reivindicou a importancia desta colaboración, mediante a que se busca mellorar a calidade de vida das persoas xordas da provincia e as súas familias, así como evitar situacións de illamento.
“Este servizo de intérpretes permite superar as barreiras de comunicación e axudar á igualdade de oportunidades das persoas xordas, fomentando a súa participación social”, destacou o presidente da Deputación Provincial.
En concreto, facilita que as persoas con discapacidade auditiva poidan realizar xestións da vida diaria e actuar de modo independente, ademais de acceder en igualdade de condicións a actos, actividades e servizos sociais, de sanidade, de educación, laborais e culturais.
