Galicia inicia o verán con 1.250 casos activos de Covid-19 –tras catro días en descenso continuo–, 59 pacientes hospitalizados por este coronavirus –un menos que a xornada anterior– e 56 novos contaxios –case unha vintena menos–.
Segundo os datos publicados na mañá deste luns pola Consellería de Sanidade con rexistros ata as 18,00 horas deste domingo, por áreas sanitarias, a presión hospitalaria mantense en Lugo, onde segue un en críticos e tres noutras unidades.
CASOS ACTIVOS EN DESCENSO
Pola súa banda, os casos activos de Covid-19 continúan coa tendencia descendente por cuarta xornada consecutiva e arrincan este verán con 1.250, que supoñen 20 menos que a xornada anterior, ao haber máis altas (75) que contaxios (56), ao que se engade un falecemento. Na provincia de lugo, as infeccións activas descenden en 3 casos, polo que o número total de casos activos é de 151.
MENOS CONTAXIOS
En canto aos novos contaxios de Covid detectados con calquera tipo de proba arrincan esta semana con 56 en Galicia, que supoñen 19 menos que a xornada anterior, na que houbo 75. Dos novos casos, nove son da área provincial de Lugo.
