Axentes da Policía Nacional adscritos á Comisaría Provincial de Lugo, encargados das investigacións relativas á saúde pública así como aos delitos relacionados co patrimonio, detiveron a dous homes de mediana idade “con amplos antecedentes” por senllos delitos de tráfico de drogas, reclamación xudicial e furto.
Así o informou a Policía Nacional, que detallou que un dos detidos foi arrestado durante a investigación dun punto de venda de sustancias estupefacientes na zona da Fonte dos Ranchos, onde os policías observaron que o agora detido realizaba “unha venda de pastillas de Trankimacin a unha compradora”.
Por iso, o vendedor foi detido de forma inmediata e, unha vez en dependencias policiais para realizar o atestado, comprobouse a través das bases de datos da Dirección Xeral da Policía de que lle constaba unha requisitoria dun xulgado de Vigo por un roubo con forza.
No mesmo día foi detido na zona da Piringalla coa Avenida da Coruña outro home por tráfico de drogas. A semana pasada foi detido outro home por tráfico de drogas na zona da Medusa.
Nesta ocasión tratábase de venda de haxix no propio domicilio, ao que acudían os compradores, para facerse coa dose correspondente, polo que, asegura a Policía, “a investigación foi máis complicada para conseguir as probas necesarias que vinculasen ao detido co tráfico de drogas”, que finalmente foi interceptado cando realizaba unha venda de haxix, motivo polo que foi arrestado.
