O cribado realizado con probas diagnósticas da covid-19 a persoal da Deputación de Lugo tras detectarse un positivo na área de Recadación non detectou novos casos.
Segundo trasladou a institución provincial, as probas realizáronse a 37 traballadores de Recadación despois de que este martes se confirmara o contaxio dun profesional nas oficinas situadas na rúa Tui.
Deste xeito, a Deputación Provincial adoptou as medidas para minimizar os riscos de propagación do virus establecidas polas autoridades sanitarias, reforzándoas en base a protocolos propios deseñados polo servizo de Prevención. Así, activouse o traballo non presencial para o persoal da área de recadación ata coñecerse os resultados do cribado.
Tras non detectarse novos casos, tres persoas continúan o desenvolvemento do seu traballo en remoto, a contaxiada e outras dúas consideradas como contactos estreitos, mentres os demais traballadores reincorporáronse ás oficinas.
