A Fiscalía pide 9 anos de prisión para un acusado de agredir sexualmente a unha menor que se atopaba baixo efectos do alcol o día de Ano Novo de 2020 nun garaxe apartado en Lugo e ao que se xulgará desde este xoves na sección segunda da Audiencia Provincial.
Segundo recolle o escrito de acusación do Ministerio Fiscal, os feitos tiveron lugar sobre as 5,30 horas do 1 de xaneiro de 2020, cando o procesado, “aproveitándose o estado de intoxicación etílica e submisión química no que se atopaba a menor”, á que atopara na vía pública nas inmediacións da praza Maior de Lugo, dirixiuna a un garaxe apartado.
Despois, “agarrouna polo pescozo” e “tapoulle a boca” situándose encima dela “mentres quitaba a roupa e lle daba na cara”. Ademais, comezou a “tocarlle os peitos e a vaxina” e a “tentar penetrala vaxinalmente”, aínda que non logrou este último propósito. Nese momento, foi sorprendido por un viandante que escoitou gritar á menor, que sufriu lesións a consecuencia dos feitos.
Posteriormente, o día 2 de xaneiro de 2020, acordouse a prisión provisional do procesado, situación que se mantén polo momento, en virtude dun auto ditado polo Xulgado de Instrución 1 de Lugo.
O Ministerio Fiscal demandou 9 anos de prisión para o acusado, ao que considera responsable dun delito de agresión sexual en grao de tentativa, así como que se lle prohiba achegarse á menor ou comunicarse con ela durante 10 anos. Tamén reclamou que se impoña a medida de liberdade vixiada durante os 10 anos posteriores ao cumprimento da pena de cárcere.
