EFE | A Asociación Lugo Monumental, que agrupa os negocios do centro histórico de Lugo, fíxose “eco das protestas dos seus asociados” en relación aos “problemas da sede electrónica” do Concello para presentar a solicitude das axudas ás empresas afectadas pola pandemia. “Non puideron facelo ou lograron facelo horas máis tarde”, lamentan.

Segundo este colectivo, “ao tratarse de axudas cuxo baremo é exclusivamente a orde de entrada en rexistro da solicitude”, este “erro na web municipal implica que algúns interesados que tentaron presentar a documentación á primeira hora na sede” electrónica do Concello “non puideron facelo ata horas máis tarde”.

Por iso, Lugo Monumental pídelle ao Concello que “acepte as solicitudes presentadas por calquera medio alternativo”, como as “plataformas electrónicas do Estado ou a Xunta”, así como que sexan aprobadas “todas as axudas solicitadas durante os días 20 e 21 abril”, sempre que os solicitantes cumpran os requisitos da convocatoria, á “marxe da hora de entrada”.

Tamén pide que se “revise a tecnoloxía usada na sede electrónica municipal, para evitar futuros colapsos do sistema”.

O CONCELLO ADMITE FALLOS

Pola súa banda, o goberno local de Lugo informou de que onte, sobre as 12:30 horas xa foran presentadas ao redor de 150 instancias, aínda que recoñeceu que “houbo pequenas incidencias na Plataforma Electrónica, debido a que a elevadísima demanda que estas axudas” provocou, “por momentos”, unha “saturación da rede”.

En todo caso o goberno local asegura que foron “solucionadas en cuestión de minutos”, de maneira que “as peticións que chegan séguense tramitando de forma ininterrompida”.