O Parlamento de Galicia aprobou este mércores unha iniciativa do PPdeG para instar á Xunta a reclamar ao Goberno o mantemento das salas do 091 da Policía Nacional de Lugo e Ourense e a aumentar os medios humanos e materiais destas comisarías provinciais.
No marco da Comisión Institucional, de Administración Xeral, Xustiza e Interior, a deputada ‘popular’ Noelia Pérez defendeu esta proposición non de lei, que foi apoiada polo BNG e ante a que o PSdeG se abstivo, e remarcou a importancia de que este servizo se preste desde un modo próximo á cidadanía, xa que “contribúe ao benestar e a calidade de vida das persoas”.
Nesta liña, lamentou que se vaian a eliminar as salas do 091 de Lugo e Ourense “en pleno Ano Santo” e durante unha pandemia, unha medida tomada en base a “criterios económicos”, que se antepoñen “á seguridade de veciños, turistas e peregrinos”, e que representa “un novo agravio do Goberno central” á comunidade.
