Efectivos do Grupo de Emerxencias Supramunicipal de Becerreá atoparon morto no seu domicilio de Castroverde a un home dependente de mediana idade. Os axentes foron requiridos polo aviso dun veciño na tarde deste domingo, e logo de tirar a porta abaixo, atoparon o corpo sen vida.

O defunto amosaba signos de avanzado estado de descomposición, polo que calcúlase que levaba días morto na vivenda. Eduardo P., de 54 anos, vivía só, e segundo recolleu GaliciaConfidencial, tiña un trastorno psicolóxico, amais de varias afectacións físicas.

A misa polo defunto celebrarase na tarde deste luns, ás 19.00 horas, na capela do Tanatorio Marzo de Castroverde. Seguidamente recibirá sepultura no camposanto da localidade lucense.