EFE | O auditorio de Magoi, na cidade de Lugo, que aínda permanece pechado, levará previsiblemente o nome do grupo musical Fuxan os ventos.
Así o anunciou esta mañá a concelleira de Cultura, Turismo e Promoción da Lingua de Lugo, Maite Ferreiro, quen explicou que Fuxan Os Ventos “é un dos grupos musicais galegos máis importantes” das últimas décadas. “En 2022 cumpriranse cincuenta anos desde a súa formación, en 1972”, lembrou.
“É un grupo que fixo moito pola nosa lingua e pola nosa cultura, por dar a coñecer a autores, poetas e poemas galegos. Levou o orgullo da nosa lingua a moita xente nova que naquel momento comezaba a rexurdir no idioma despois dunha época escura”, dixo Ferreiro. Trátase, por tanto, “dun recoñecemento da cidade de Lugo a un grupo fixo tanto pola nosa cultura, polo noso idioma e polo noso país”.
Así mesmo, lembrou que desde a área de Cultura do Concello de Lugo quíxose “lembrar esta data, dándolle tamén ao auditorio un significado especial, de apoio ás agrupacións culturais galegas e lucenses”.
O PP PIDE CONSENSO
Pola súa banda, o voceiro do grupo municipal do PP, Ramón Carballo, afeou que se “bautizara” o auditorio “sen consenso”. Para os populares, o nome dunha infraestrutura coma esta debería acordarse nunha xunta de voceiros ou no órgano que estime oportuno o goberno local. “Por ética e para non danar a imaxe de ningún posible candidato e candidata a bautizar o edificio debería de debaterse de xeito interno e unicamente desvelarse o nome elixido por unanimidade de todos os grupos”, afirmou.
Dende o Partido Popular avogan por escoller un nome de muller, xa que “son moitas as mulleres lucenses que destacaron na cultura galega e nacional”, propoñen.
