O Servizo Galego de Saúde (Sergas) continúa co proceso de vacinación na área sanitaria de Lugo – A Mariña – Monforte, onde ata o día de onte se puxeron 31.952 doses. Deste total, 20.620 foron aplicadas en 10.310 persoas que xa recibiron as dúas doses e, polo tanto, están completamente vacinadas.
O xerente da área sanitaria, Ramón Ares, explicou que o Sergas segue inmerso na campaña de vacinación, un proceso “que se está realizando de maneira áxil e sen ningunha incidencia destacable”.
Lembrou que a campaña arrincou a finais de ano nas residencias de maiores. Usuarios e traballadores sociosanitarios foron os primeiros en ser vacinados, seguidos de profesionais sanitarios. Agora o Sergas céntrase no colectivo de docentes, que están a ser citados nos tres hospitais públicos, e nas persoas maiores de 80 anos, cuxa vacinación se desenvolve nos centros de saúde das cabeceiras de comarca.
Segundo datos de Ramón Ares, estanse aplicando máis de 800 doses diarias de media a maiores de 80 anos na provincia de Lugo. “O ritmo de vacinación vai vir dado polo número de vacinas que teñamos dispoñibles”, avanzou.
CRIBADO UNIVERSITARIO
Por outra banda, o xerente da área sanitaria tamén anunciou que a comezos da semana que vén se realizará o cribado universitario a estudantes da Universidade de Santiago de Compostela no Campus de Lugo. Son case 4.000 alumnas e alumnos que serán citados vía SMS para realizar un test de antíxenos.
Cadrando co inicio das clases presenciais, “o obxectivo é detectar posibles positivos asintomáticos para evitar as cadeas de transmisión”. As probas efectuaranse na Facultade de Veterinaria os vindeiros luns e martes, en horario de mañá e de tarde. Ata alí desprazaranse sete equipos de vacinación que tomarán as mostras e farán o rexistro in situ.
