O Sergas iniciou este luns 22 de febreiro a campaña de vacinación a persoas maiores de 80 anos non usuarias de residencias. Na provincia de Lugo, Catalina Heras Díez foi a primeira paciente en recibir o antídoto. Foi no centro de saúde de Fingoi, na capital lucense.

Segundo explicou a directora de enfermaría da área sanitaria de Lugo, María Jesús Pérez Taboada, a campaña arrincou sen incidencias na provincia, onde esta semana  está previsto vacinar a 850 maiores cada día. “A vindeira semana poderase incrementar esta cifra en función do número de doses que recibamos”, precisou.

Os equipos sanitarios que xa aplicaron o antídoto aos usuarios das residencias sociosanitarias serán tamén os encargados de desenvolver este proceso de vacinación, que terá lugar en todos os servizos de atención primaria da provincia.