O tenente de alcalde de Lugo, Rubén Arroxo, e o edil de Infraestruturas Urbanas, Alexandre Penas, presentaron esta mañá o proxecto de transformación da Ronda da Muralla no tramo comprendido entre a rúa Santiago e a rúa Vilalba. Despois de que no 2020 se habilitara un paso peonil provisional, neste 2021 avánzase no proceso de peonalización.
O plan inclúe non só un aumento do espazo para peóns, senón unha “renovación da zona da Porta de Santiago, dando unha mellor estética ao punto da cidade no que se xuntan os tres Patrimonios da Humanidade cos que contamos”, explicou Arroxo. Ademais, sinalou que “o proxecto que se levará adiante permitirá ampliar a actuación no futuro, cando se avance na peonalización total da Ronda da Muralla”.
O alumeado deste treito consistirá en 9 luminarias LED tipo RGB, que permitirán unha iluminación adaptada segundo a hora do día. “Isto mellorará a percepción visual da Muralla”, abundou Rubén Arroxo.
En canto á circulación do tráfico, Rubén Arroxo avanzou que “os vehículos contarán con maior fluidez, ao modificarse o cruce da Ronda da Muralla coa rúa Santiago”. Con esta actuación, o cruce pasará de ter un semáforo de tres tempos a ter preferencia o tráfico que circule pola Ronda, tendo un Ceda o Paso os vehículos que se acheguen pola rúa Santiago.
Esta actuación sairá a licitación cun orzamento base de 575.990,77€, e un prazo de realización de 6 meses. “Unha vez rematen esta actuación e a peonalización do treito da Mosqueira, a veciñanza de Lugo contará coa totalidade da zona sur da Muralla humanizada”, sentenciou Rubén Arroxo.
