O Servizo Galego de Saúde (Sergas) contabiliza 1.514 casos activos de coronavirus na área sanitaria lucense; isto é, 127 menos ca no día de onte. Medran, iso si, os novos positivos detectados a través de PCR: 71 nas últimas 24 horas.
Tamén os hospitais ven aumentada a súa carga asistencial, con 97 ingresos (+3): 71 pacientes en planta (no HULA, 42; na Mariña, 9; en Monforte, 20) e 26 nas Unidades de Coidados Intensivos (25 no HULA e outro na Mariña).
Por outra banda, a cifra de vítimas mortais da pandemia ascende ata as 185 ao coñecerse o falecemento dun octoxenario ingresado no Hospital da Mariña e que fora diagnosticado de Covid-19. Así mesmo, os datos históricos revelan que se curaron 9.384 persoas e que se realizaron 172.080 PCR (1.092 delas onte).
EN GALICIA, BOS SINAIS
No conxunto da comunidade hai indicios de que a terceira onda da pandemia podería estar a remitir: baixa a presión hospitalaria e diminúen tamén os novos casos detectados. En concreto, hai un total de 1.145 pacientes (70 menos), dos cales 234 están na UCI. Os diagnósticos diarios descenden a 677 e os casos activos baixan a 16.643. Podes ler a información completa no Galicia Confidencial.
