A xunta de goberno da Deputación de Lugo aprobou as alegacións que a institución provincial presentará ao acordo plenario do concello leonés de Candín para cambiar o nome do municipio e pasar a chamarse Ancares. “A Deputación de Lugo defende Os Ancares como unha realidade xeográfica e social que comparten as provincias de Lugo e de León”, subliñou o presidente da Deputación, José Tomé.
Deste xeito, o presidente explicou que as alegacións da Deputación recollen que o cambio de topónimo “vulnera a lexislación vixente, carece de fundamentación histórica rigorosa e completa, e ignora o feito incontestable de que Ancares é unha ampla realidade xeográfica, social, cultural, medioambiental e etnográfica que lle dá nome a un territorio no que se asentan municipios da provincia de Lugo e de León”.
As alegacións da Deputación están expostas e fundamentadas en tres informes técnicos que se adxuntan no expediente que a institución enviará a Candín, e que foron elaborados polos servizos provinciais de Asistencia Xurídica, Económica e Técnica aos Concellos, e de Medio Ambiente, e polo historiador Xabier Moure, do colectivo Patrimonio dos Ancares.
En base a estes argumentos, a Deputación solicita ao Ayuntamiento de Candín que arquive o expediente para cambiar o nome do municipio ou que, en todo caso, incorpore ao seu topónimo a alusión á súa pertenza a Ancares, pasando a denominarse Candín de Ancares.
O Presidente explicou que as alegacións da Deputación ao acordo plenario que adoptou Candín o día 16 de decembro para o cambio de topónimo e que ten en exposición pública baséanse en seis argumentos fundamentais.
CONTRA A LEXISLACIÓN
A primeira das alegacións remite ao artigo 24.1 da Lei 1/1998, de 4 de xuño do Réxime Local de Castela e León, onde se explicita que deberán respectarse as denominacións dos municipios existentes á entrada de vigor da lei, sen que poidan estes ser coincidentes ou producir confusións con outras do territorio do Estado.
A Deputación entende que, de seguir adiante co procedemento, o Ayuntamiento de Candín vulneraría esta disposición legal porque xa existe unha comarca recoñecida con este topónimo.
SEN RIGOR HISTÓRICO
Candín asegura que o nome de Ancares comezou a usarse nos anos 60 coa creación da Reserva Nacional da Caza, mentres que na parte galega xurdiría nos 90 coa aprobación do Mapa Comarcal de Galicia. Porén, o ente provincial recorre a documentación histórica que acredita o uso do topónimo Ancares para referirse á serra completa cando menos dende o ano 572.
TODA UNHA COMARCA XEOGRÁFICA
Nas alegacións, tamén se explica que “Ancares dá nome a toda unha comarca conformada fisicamente pola Serra dos Ancares e polos seus accidentes xeográficos, non só un único municipio”.
REALIDADE SOCIAL COMÚN
O cuarto argumento que alega a Deputación é o de que “Ancares é unha ampla realidade social, cultural, medioambiental e etnográfica, cunha identidade propia e única, que comparte rasgos, e tamén retos e oportunidades comúns” que trascenden as fronteiras autonómicas.d
CANDÍN DE ANCARES
Aporta, ademais, unha alternativa: a de que Candín incorpore a denominación de Ancares como un engadido, non coma un total, e pase a chamarse Candín de Ancares.
DANO AOS INTERESES DE LUGO
Por último, a Deputación entende que “a apropiación do topónimo lesiona gravemente os intereses da provincia de Lugo, pero tamén do conxunto da comarca dos Ancares”. “Limitar o nome dos Ancares só ó municipio de Candín supón unha perda de oportunidades para o desenvolvemento social e económico. Estariamos pechando a porta á colaboración e ás sinerxías das administracións, dos axentes que traballan sobre o territorio e dos veciños para o impulso de iniciativas que contribúan a aproveitar o potencial desta zona, pero tamén para afrontar os seus retos comúns, tales como a perda de habitantes, o envellecemento da poboación e o acceso aos servizos públicos”, argumentou o presidente.
