EFE | O grupo municipal do Partido Popular de Lugo solicitou unha revisión da iluminación pública da cidade desde “unha perspectiva de xénero”, porque hai “zonas en penumbra” nas cales “as mulleres non se senten seguras” cando cae a noite.
A edil Macamen López, en declaracións aos medios de comunicación, pediulle ao goberno local que “aplique a perspectiva de xénero ao deseño da cidade”, dado que “non son tan importantes as estatísticas de denuncias policiais como a percepción subxectiva de que un espazo sexa seguro ou non o sexa”.
Pediu “menos propaganda e máis axilidade na renovación da iluminación nas rúas con déficit de iluminación”, dado que “estamos a falar dun problema real que agora se agrava co peche de negocios”, o que “aínda reduce máis a iluminación das beirarrúas”. “Unha boa iluminación é fundamental para mellorar a mobilidade e a seguridade”, engade, e mesmo pode ser “un gran reclamo para fomentar o turismo”.
