A área sanitaria de Lugo rexistra hoxe un dos peores datos de toda a pandemia no que respecta a casos detectados nun só día: nas últimas 24 horas confirmáronse 184 positivos de coronavirus mediante probas PCR. Onte esta cifra situábase por baixo do centenar. Do mesmo xeito, tamén se incrementa o total de casos activos ata achegarse aos 2.000 en toda a provincia: son, en concreto, 1954.
Nos hospitais a situación segue similar á referida onte polo Sergas. Este mércores 27 de xaneiro rexístranse73 hospitalizacións (+1): 58 en planta e 15 nas Unidades de Coidados Intensivos. Destes últimos, están todos no HULA agás un paciente que está a ser atendido na UCI de Burela. Ademais, o Hospital Universitario Lucus Augusti atende 29 pacientes en unidades de hospitalización; o da Mariña, 17, o de Monforte, 11; e o Polusa, 1.
Nas últimas 24 horas realizáronse 1.493 probas PCR, do total de 152.684 que se efectuaron dende o inicio da pandemia. Os datos históricos tamén revelan que se curaron 7.556 persoas e que, ata o momento, faleceron 162 que foran diagnosticadas con Covid-19.
AS UCI GALEGAS, EN MÁXIMOS
Mentres, en Galicia vólvense bater récords. A presión nas UCI xa é a máis elevada de toda a pandemia, con 178 pacientes ingresados neste tipo de unidades. Sucede isto nunha xornada na que se rompeu coa dinámica de certa estabilidade de contaxios: diagnosticáronse 1.586 novos positivos. Podes ler máis información no Galicia Confidencial.
