EFE | Decenas de peiteadores e propietarios de salóns de beleza concentráronse este mércores ante o Concello de Lugo para esixir unha rebaixa do IVE, dado que neste momento están a cotizar ao 21%, un tipo impositivo que consideran totalmente inxusto, porque a súa actividade “é esencial” e non de “luxo”.

Durante unha hora, entre as 10 e as 11:00 horas, vestidos totalmente de negro e desafiando ás inclemencias do tempo, os peiteadores de Lugo permaneceron concentrados ante o Concello para facerse oír, mantendo en todo momento a distancia de seguridade como medida de prevención ante a Covid-19. Todos eles portaban pancartas cun fondo amarelo nas que se reclamaba “un IVE xusto” para a actividade que desenvolven salóns de peiteado, barbarías e salóns de beleza.

Carmen Barrios, que ten un salón de peiteado na Rúa Galicia, na propia cidade, contou a EFE que o que pide o sector é un IVE acorde ao servizo que prestan, que é “esencial” para a sociedade. “Levamos anos cotizando por un IVEde luxo, cando terían que aplicarnos un imposto como actividade esencial que somos. Seguiremos protestando ata logralo”, engadiu.

Máis de 100 asociacións, colectivos, plataformas, marcas, provedores e clubs profesionais do sector en toda España apoian estas concentracións, en representación de máis de 10.000 salóns de peiteado e de estética de todo o país.