Susto nunha céntrica rúa de Lugo capital. Un home de mediada idade circulaba con normalidade nun coche emprestado cando, sen previo aviso, o motor do vehículo incendiouse. A rápida evolución das lapas obrigou ao único ocupante a abandonar este Peugeot, de vinte anos pero apenas 20.000 quilómetros, no medio da rúa Quiroga.
O suceso aconteceu sobre as 9.25 horas deste venres. Algúns veciños pediron ao condutor que apartara o coche, pero non foi posible polo temor a que as lapas puideran estenderse á parte traseira. O home que conducía saíu ileso e deu aviso á Policía Local, que mobilizou asemade a unha dotación de bombeiros de Lugo.
Rapidamente conseguiron apagar o lume, localizado unicamente na parte dianteira. Lamentablemente, o vehículo quedou inutilizado, e unha mancha de aceite podería dificultar a circulación na rúa Quiroga.
