A neve e as xeadas deixaron unha situación “difícil” no concello da Fonsagrada, segundo confirmou o rexedor local, Carlos López. Cinco máquinas quitaneves actúan para atallar as consecuencias do temporal. “Esta noite volveu xear e está a volver a nevar. Ponse complicado“, asegurou.

En todo caso, garantiu que as autoridades están a facer o que poden cos medios dos que dispoñen e “tratando de abrir” os preto de 1.200 quilómetros de pistas municipais. A pesar diso, sinalou que non hai núcleos “illados”.

“Pido paciencia á xente nos núcleos rurais e que saiban que cando haxa algunha urxencia non teñen máis que porse en contacto comigo“, comprometeu, para matizar que “é imposible chegar ao mesmo tempo a todos os lados”.

UNHA MÁQUINA QUITANEVES Á CUNETA

Carlos López calculou que a capa de neve chega nalgunhas zonas “ata os corenta centímetros”, sobre todo no límite con Asturias, onde se rexistran “problemas”. “De feito tivemos unha incidencia cun quitaneves que se nos foi á cuneta e imos sacala hoxe”, engadiu, para recomendar aos veciños que “eviten viaxar” salvo “unha urxencia, porque a situación non é fácil”.