A Policía Nacional alertou dun aumento en Lugo das denuncias de estafas por Internet, cunha media de oito diarias. De feito, nos últimos meses chegaron a duplicarse.
Segundo informa a Comisaría Provincial, desde o ano de creación da Unidade de Delincuencia Especializada e Violenta, en funcionamento desde 2012, rexistrouse un incremento constante destes delitos, que cifra nun 25%.
Tamén estima que do total de asuntos ou denuncias recollidas na Comisaría de Lugo, hai un 70% que “utilizan como instrumento para perpetrar o delito medios tecnolóxicos, substancialmente estafas, cargos indebidos, defraudacións e outros vinculados á intimidade e indemnidade sexual”.
Ademais, apunta que nos últimos meses, coincidindo coa pandemia, as denuncias duplicáronse. Pasaron “de catro ou cinco diarias a sete ou oito”. Do mesmo xeito, tamén se pasou de “1.500 a 2.500 asuntos” deste tipo por ano. “Hai ata un 75% máis de esclarecidos que en 2012 asociados a estafas tecnolóxicas”, alerta nun comunicado no que apela a adoptar medidas de precaución.
