O presidente da Deputación de Lugo, José Tomé, e o arcebispo Alfonso Carrasco Rouco asinaron este mércores un convenio de colaboración polo que ambas as entidades destinarán un total de 300.000 euros á conservación do patrimonio histórico e artístico da provincia.

En concreto, o acordo contempla que a institución provincial achegue unha cantidade de 150.000 euros á diocese que, á súa vez, destinará outros 150.000 euros á mellora e rehabilitación de seis bens culturais situados nos municipios de Lugo, Monforte, O Incio, O Saviñao e O Courel.

No acto, do que informou a Deputación nun comunicado, Tomé sinalou que, con esta achega, a institución provincial demostra o seu “compromiso pola promoción do territorio para dinamizar a economía e o turismo”. “Un compromiso que demostramos desde o principio do mandato con iniciativas importantes, como a entrada da institución na Ruta Transrománica, recoñecida polo Consello de Europa, e tamén nos orzamentos de 2021, nos que aumentamos un 10% os fondos para o turismo“, indicou.

En concreto, o acordo asinado este mércores executarase en dous anos e recolle actuacións na Catedral de Lugo –ás que se destinarán 93.000 euros–; na igrexa de San Miguel de Marcelle e na Santa María da Régoa, ambas as en Monforte –recibirán 10.000 e 45.000 euros, respectivamente–; na de San Salvador de Vilaesteva, no Saviñao –50.000 euros–; na de San Cristovo da Cervela, no Incio –50.500 euros–; así como na de San Pedro de Noceda, en Folgoso do Courel –recibirá 51.500 euros–.

No encontro celebrado no Pazo de San Marcos, o presidente da Deputación entregou ao bispo como agasallo institucional unha cesta de produtos da provincia, como aceite de Quiroga ou crema de castañas do Courel, entre outros; e o libro ‘Ribeira Sacra, Galicia para soñar’, que recolle fotografías de Antón Rodicio.