Outro “pau nas rodas”. Iso é o que supoñería para a veciñanza de Baamonde e arredores o peche da escola unitaria, decisión que anunciou recentemente o Concello de Begonte. O goberno local procura a fusión do Ceip de Baamonde co Ceip Virxe do Corpiño (Begonte) para impulsar no primeiro edificio un futuro conservatorio municipal. A noticia, que chegou de maneira “abrupta” ás nais e pais, causou o total rexeitamento e xa foi motivo de mobilizacións na súa contra.
Se ben o alcalde, José Ulla (PP), defende que a unificación do alumnado favorecería o ambiente educativo, dende a ANPA do CEIP de Baamonde pensan todo o contrario. As nais e pais da trintena de estudantes deste cole unitario consideran que o servizo alí ofrecido é “excelente”, precisamente pola baixa ratio entre profes e alumnado. Coidan que sería todo un erro mudar isto xusto en tempos de coronavirus, nos que o máis adecuado é desdobrar aula, non reagrupalas ata alcanzar os cen nenos nun só centro.
A iniciativa de pechar o CEIP parte do goberno local, e sobre ela aínda non se pronunciou oficialmente a Consellería de Educación. Os afectados quéixanse de que non se tivo en conta a súa opinión, senón que simplemente se “soltou a bomba” sen atender a argumentos.
CONTRA OS RECORTES NA PROVINCIA
Nais e pais participaron nunha numerosa concentración o pasado domingo, algo que prevén repetir na vindeira fin de semana. Reivindican que se repense esta decisión e que a Xunta de Galicia expoña unha postura clara ao respecto.
No entanto, os socialistas da provincia xa amosaron o seu apoio ás peticións deste colectivo e comprometéronse a levar o caso ao Parlamento de Galicia. A secretaria do PSdeG-Lugo, Patricia Otero, lamentou que este recorte de servizos “afecta de pleno ao rural da nosa provincia” e ligou este caso a outros de concellos próximos: “Primeiro comezaron os recortes coas liñas de autobuses en Lugo, despois os centros de saúde como en Parga ou Castro de Rei, e agora pechan os colexios”, afeou.
