Os orzamentos do Concello de Lugo para o ano 2021 ascenderán a 106.478.713 euros, un 6,5% máis ca os deste exercicio, segundo informaron este xoves en rolda de prensa a alcaldesa, Lara Méndez, e o tenente de alcalde, Rubén Arroxo.

Na súa intervención, Méndez destacou que son “uns orzamentos excepcionais, para unha situación pandémica excepcional”, á vez que os describía como “solidarios, e pensados para a recuperación de Lugo”. As contas serán levadas a un pleno extraordinario o próximo 18 de decembro.

Da cantidade total, 31,2 millóns dedícanse a políticas “sociais”, o que supón “un 29,3 por cento” do orzamento, co obxectivo de conseguir melloras na calidade de vida nos ámbitos rural e urbano e por integrar aos sectores máis desfavorecidos” da cidade. Así mesmo, outros 13,8 consígnanse para “políticas de benestar”, concretaba Méndez.

Ademais, contémplase outra partida de 5,3 millóns de euros para “axudas a autónomos e emprendedores”. En canto a investimentos, o concello de Lugo reservará case 15 millóns de euros, “un corenta por cento máis”, presumía a alcaldesa, ca os de 2020 (10,4 millóns)

Pola súa banda, o primeiro tenente de alcalde, Rubén Arroxo, congratulouse de que estes orzamentos sexan “expansivos”, e apelou a que, nesta situación de crise sanitaria, “as administracións son as que teñen que facer grandes investimentos”.

O PP PIDE DIÁLOGO

Á súa vez, o anuncio destes orzamentos non sentou ben no grupo municipal do PP, que traslada o seu “malestar” polas formas nas que o bipartito presentou as contas, ao “ofrecer a información antes aos medios de comunicación ca aos grupos da oposición”.

Os populares critican que o goberno local “rexeita traballar de forma conxunta e aparca o diálogo“, cando “o lóxico sería traballar sobre un borrador” e “chegar a consensos”. Aseguran que non obtiveron resposta a ningunha das 47 propostas que presentaron o 5 de novembro para incorporar a este documento.