Unha colisión entre dúas furgonetas e un autobús escolar ocorrida na mañá deste martes en Lugo saldouse con dúas persoas feridas, que foron trasladadas ao hospital. Fontes do 112 Galicia explicaron que os feitos tiveron lugar no Alto de Rubiás sobre as 8,00 horas, cando un particular alertou de que tivera lugar unha colisión entre vehículos e da posibilidade de que houbese persoas atrapadas.
O 112 Galicia mobilizou a efectivos de Protección Civil, o 061 e a Policía Local. Tamén se desprazaron ao lugar os bombeiros, cuxa intervención non foi necesaria ao non quedar atrapada ningunha persoa nos vehículos.
Así mesmo, trasladáronse ao lugar axentes da Garda Civil, que confirmaron ao 112 Galicia que tivera lugar unha colisión entre dúas furgonetas e un autobús escolar. Como consecuencia, resultaron feridas dúas persoas que viaxaban nos dous primeiros vehículos.
Fontes do servizo do 061 detallaron que, tras ter coñecemento do accidente, enviáronse unha ambulancia de soporte vital básico e outra de soporte vital avanzado á zona. Unha vez no lugar, o persoal sanitario atendeu a tres pacientes dos que un recibiu o alta.
Ademais, os outros dous pacientes, un home de 51 anos, J.V.T., e un mozo de 26, D.L.S., ocupantes das furgonetas, foron trasladados ao Hospital Lucus Augusti. Mentres, catro nenos que viaxaban no autobús accidentado resultaron ilesos.
