O grupo provincial do PP expuxo á Deputación de Lugo a creación dun comité de expertos para asesorar fronte á pandemia da COVID-19.
O portavoz provincial, Javier Castiñeira, afirma que este organismo “non pode permanecer impasible nas actuais circunstancias”, e considera que “hai que evitar que se repita o que pasou ao comezo da pandemia“. Entón, asegura, a institución “chegou tarde absolutamente a todo e tentou improvisar”.
Así as cousas, Castiñeira asegura que “é necesario que haxa un comité de expertos, persoas que tecnicamente poidan asesorar aos concellos, á Deputación e, especialmente, ás residencias de anciáns que ten por toda a provincia“.
Os populares queren que sexa convocada unha reunión da xunta de portavoces para analizar a situación na provincia en relación coa pandemia e para acordar a creación deste comité.
