O sábado 22 de agosto terá lugar en Baleira a primeira filmersión do mundo chamada ‘O camiño inmersivo‘ organizada pola produtora galega microsoños. Todo isto é posible grazas a unha campaña de crowdfunding na que a produtora conseguiu os apoios necesarios para este proxecto.

As filmersións son un novo concepto de ocio no que o espectador tradicional dun filme convértese nun participante da historia, que interactúa cas personaxes. Contan cunha coidada ambientación, que mergulla aos participantes na época e no lugar retratados. A experiencia é filmada dando lugar a unha peza audiovisual filmersiva.

‘O camiño inmersivo’ realizarase en distintos puntos da xeografía galega, alí por onde pasa o Camiño de Santiago. A historia incorporará lendas da icónica ruta. Esta filmersión ofrece un xeito novidoso de vivir o cinema, no que se deixan de lado os convencionalismos do formato para mesturalo coa representación histórica e a adrenalina dunha experiencia de aventuras.