O cineasta monfortino Dani de la Torre arrincará en agosto a rodaxe da película ‘Live is life’, un proxecto que suporá a súa volta á gran pantalla tras a estrea da serie ‘La unidad’. O director non se esquece de Lugo e nesta longametraxe volve escoller diferentes localizacións da provincia para gravar.
Repite a experiencia que xa probara con ‘La sombra de la ley’ na capital luguesa e agora viaxará a distintos puntos para esta nova película que anda a debullar. Entre os destinos, tamén estará Monforte de Lemos, o seu concello natal.
Nesta ocasión, o filme conta co guión de Albert Espinosa e conta a historia de cinco mozos de mediados dos 80 que tentan cumprir os seus soños nunha noite de San Xoán nunha aldea galega. “Cando recibín o guión de ‘Live is life’, volvín ver o neno que fun, volvín sentir o sol dunha tarde dos oitenta, pedaleando na bici cos meus amigos. Volvín lembrar esas tardes interminables de aventuras, onde o único que importaba era espremer cada segundo antes de volver a casa”, sinalou Dani de la Torre.
En palabras de Espinosa, esta película “é un canto á vida e á felicidade” e céntrase na experiencia duns adolescentes que “aínda cren nos soños” e que emprenden unha “aventura” para “salvar o que é máis importante con 15 anos”. “Facía anos que quería escribir unha película familiar que tocase moitos corazóns e que te levase inmediatamente á nenez e á adolescencia. Contar con Dani de la Torre é un soño porque é como atopar unha alma xemelga que dará ás a este guión”, dixo o guionista.
