Axentes da Policía Local de Lugo interceptaron este xoves de madrugada un condutor que obtivo resultado positivo na proba de alcoholemia cando circulaba sen facer un uso correcto do cinto nun vehículo coas súas tres fillas de tres e sete anos no interior.
Segundo informou a Policía Local, o condutor foi parado na Avenida da Coruña ao presentar signos de inxerir bebidas alcohólicas. Nas probas deu un resultado de 0,42 miligramos por litro, o que “supón unha multa de 500 euros e a retirada de catro puntos do permiso de condución”, destacaron as mesmas fontes policiais.
Tanto o condutor como a outra persoa que os acompañaba no asento do copiloto “non levaban o cinto de seguridade correctamente abrochado”, destacou a Policía Local, polo que tamén foron denunciados con multa de 200 euros. Para o piloto isto tamén supón a retirada de tres puntos do permiso de conducir.
ITV CADUCADA
Así mesmo, os axentes comprobaron que o vehículo tiña a Inspección Técnica de Vehículos (ITV) caducada, polo que tamén foi sancionado o titular do turismo con 200 euros.
As mesmas fontes policiais destacaron que os axentes “prestaron especial atención á situación das nenas” e comprobaron que se atopaba “en bo estado e estaban tranquilas”. Requiriron a presenza dun taxi para que fosen trasladadas ao seu domicilio e o vehículo quedou inmobilizado.
