A ‘nova normalidade’ chega a Lugo canda un novo descenso no reconto de casos activos: a área sanitaria rexistra este luns 15 de xuño 20 casos activos por coronavirus, un menos ca os contabilizados o domingo. 

Dese total, hai dous pacientes que continúan ingresados no Hospital Universitario Lucus Augusti (HULA), segundo datos do Sergas. Os outros 18 están a ser atendidos nos seus domicilios.

Ademais, a Consellería de Política Social refire cero positivos por COVID-19 no conxunto das residencias da provincia de Lugo. O Centro de Atención a Persoas con Discapacidade DomusVi de Bóveda era a única que rexistraba casos activos en Lugo a fins da semana pasada. Coa alta do último usuario contaxiado, tamén este centro quedou libre da pandemia.

GALICIA

Pola súa parte, a Dirección Xeral de Saúde Pública da Consellería de Sanidade informou de 348 casos activos en Galicia, tres menos ca onte. A área de Vigo segue a ser a que máis positivos acolle (140), seguida da Coruña (108) e moi lonxe do resto (Santiago, con 34; Ourense, con 26; Ferrol, con 12; e Pontevedra, con 8).

Do total de pacientes positivos, oito están en unidades de hospitalización e as Unidades de Coidados Intensivos continúan sen enfermos de coronavirus.

Ata o momento, na comunidade hai un total de 10.849 persoas curadas e os falecementos mantéñense en 619. Un total de 274 vítimas mortais estaban vinculadas con residencias (delas, 132 morreron no propios centros xeriátricos), o que supón un 44,26 % do conxunto de falecidos en Galicia.