A sección segunda da Audiencia Provincial de Lugo condenou a catro anos e medio de cárcere, como autor dun delito de tráfico de drogas, a un condutor interceptado na estrada LU-934 con 49 gramos de cocaína no seu poder.
Os feitos remóntanse ao mes de marzo de 2019, cando o condenado foi interceptado por unha patrulla da Garda Civil que realizaba un control rutineiro na LU-934. Ao rexistrar o seu vehículo, os axentes localizaron, no interior do cadro de mandos do coche, un envoltorio rodeado de cinta americana que contiña 49,13 gramos de cocaína, así como pequenas cantidades de cannabis. O valor da droga no mercado alcanzaría os 8.450 euros, segundo a sentenza.
Tal e como recolle o fallo, o home xa fora condenado no ano 2010 a 11 anos de prisión por un delito de tráfico de drogas, así como a sete anos e catro meses de cárcere como integrante de grupo criminal vinculado ao tráfico de estupefacientes.
Ademais dos catro anos e medio de cárcere, o tribunal, que tivo en conta a agravante de reincidencia, ínstao a abonar unha multa de 15.000 euros.
