A área sanitaria de Lugo non presenta cambios este luns 8 de xuño en canto aos casos activos por coronavirus. Sanidade segue informando de 30 positivos en activo, cunha única hospitalización en planta no HULA.
Hai, ademais, 29 persoas que están recibindo atención hospitalaria a domicilio. As altas epidemiolóxicas sitúanse nas 899 e os falecementos mantéñense en 28.
Outro dato favorable extráese da situación nas residencias da provincia. Só un usuario permanece como positivo en COVID-19 en toda a provincia. Trátase dunha persoa residente no Centro de Atención a Persoas con Discapacidade DomusVi de Bóveda.
GALICIA
No conxunto autonómico, Sanidade informa de 515 casos activos, nove menos ca onte, dos cales 20 continúan hospitalizados. Os hospitais só rexistran un paciente na unidade de críticos. Respecto dos falecementos, a cifra non varía dende hai catro días. Ata o momento, houbo 618 vítimas mortais por mor da pandemia.
