EFE | Axentes da Policía Local de Lugo tiveron que intervir a pasada fin de semana para parar as festas que se estaban celebrando de madrugada en seis domicilios da cidade, porque os ruídos que procedían deses pisos molestaban os demais veciños dos seus respectivos edificios e interrompían o seu descanso.

Durante a noite do venres para o sábado, nun deses domicilios, concretamente na Rolda das Fontiñas, onde se estaba celebrando uns aniversarios pasadas as dúas da madrugada, os axentes tiveron que intervir en dúas ocasións. Despois dunha primeira visita, os participantes na celebración retomaron a festa e a Policía Local volveu recibir aviso preto das catro porque seguían os ruídos.

Esa mesma madrugada tiveron que intervir para que cesase o ruído que estaban a producir oito persoas que participaban nunha reunión no Camiño de Roca e ás tres e media para interromper unha festa na Calzada das Gándaras.

Na madrugada do día 6 ao 7 de xuño, tamén pararon outra reunión na Rúa Río Eo, por mor das queixas dos veciños, e a celebración duns aniversarios en San Salvador de Muxa.

Ademais, a pasada madrugada, sobre as 2:15 horas, os axentes tiveron que desprazarse á Rolda do Carme, onde os inquilinos dun piso estaban a usar un karaoke a un volume excesivamente alto e molestaban aos demais veciños do inmoble. EFE