O grupo provincial do Partido Popular dirixiuse ao presidente da Deputación de Lugo para esixirlle que convoque de novo os plenos ordinarios na institución provincial, porque neste momento do plan de “desescalada” xa non ten sentido seguir gobernando “a golpe de decreto”.

En declaracións aos medios de comunicación, o portavoz do Partido Popular, Javier Castiñeira, lembra que mañá termina o prazo para “convocar as comisións” correspondentes ao “pleno ordinario” de maio, polo que lle pide ao presidente da Deputación, a José Tomé, que faga o propio.

Desde o seu punto de vista, o “socialista Tomé séntese cómodo gobernando de forma presidencialista e a golpe de decreto” e por iso, precisamente, non convocou o pleno ordinario correspondente ao “mes de abril”.

Neste momento, lembra Castiñeira, “nada impide convocar a sesión ordinaria, adoptando as medidas adecuadas á presente fase da desescalada”. Sostén que “ten que acabarse o tempo do segredo”, porque o pleno da Deputación de Lugo non pode “seguir confinado”.