As imaxes que revelan a presenza do oso pardo no Macizo Central ourensán e no Parque Natural do Invernadoiro poñen de novo sobre a mesa a necesidade de protección desta especie en perigo de extinción. A Asociación para a Defensa Ecolóxica de Galicia (Adega) instou á Xunta a aprobar de forma “inmediata” o plan de recuperación do oso pardo na comunidade e denunciou que o proxecto e o borrador do decreto “levan gardados nun caixón desde 2013”.
Exemplares de osos pardos tamén foran avistados nos montes dos Ancares e O Courel, pero a especie atópase en perigo de extinción, polo que se piden medidas “urxentes” para o seguimento e proteccción destes mamíferos.
Aínda que Adega valora o desenvolvemento da investigación do ‘Proxecto Life Oso Courel’, que se iniciou en 2017 e que se espera que conclúa a finais deste ano, incidiu en que non pode representar “unha alternativa ao decreto de recuperación da especie”. Tamén insistiu na necesidade de que se engadan as modificacións da zonificación, xa que o documento orixinal non contemplaba serras e áreas nas que agora foron localizados algúns exemplares.
