José Luís Ramudo – EFE | Edelmira Prado Prado, sor María Trinidad ou ‘Trini’, como a coñecen cariñosamente na parroquia da Milagrosa, en Lugo, converteuse o martes, aos seus case 102 anos, na persoa máis lonxeva en superar a COVID-19 nesta provincia. Tras varias semanas ingresada no Hospital Universitario Lucus Augusti (HULA), a relixiosa recibiu a alta no día de onte, segundo informou o propio Sergas.
O párroco da Milagrosa, José Antonio Ferreiro, acolleu a noticia da recuperación de Trini con alegría e lembrou que aínda que “a súa figura pareza débil”, esa condición non debe conducir a engano, porque é “unha muller moi forte”. Diso, sen dúbida, dá fe o seu superado século de vida. En pouco máis dunha semana, se todo segue tan ben como ata o de agora, poderá celebrar o seu novo aniversarios.
“MOI COÑECIDA E QUERIDA” NA MILAGROSA
“É unha muller moi forte”, manifesta a Efe Ferreiro, “e non o digo só porque vencese á enfermidade”, senón tamén porque a pesar da súa avanzada idade, Trini sempre mantivo unha intensa actividade na parroquia da Milagrosa, onde é “moi coñecida e querida” polos fregueses.
Esta irmá da Sagrada Familia de Burdeos “levaba unha vida completamente activa” e “facía moitas cousas”, precisou o párroco, dado que se ocupaba do servizo de axuda na sancristía da parroquia. Pasaba moitas horas alí, porque era “a súa ocupación e a súa preocupación”, detalla o sacerdote. Non en balde foron moitos os fregueses que preguntaron por ela nas últimas semanas —estivo uns vinte días ingresada no HULA— e que agora esperan o seu regreso á parroquia.
A EMOCIONANTE SAÍDA DO HULA
Este 22 de abril, cando recibiu o alta na área de hospitalización, a paciente foi despedida con aplausos por parte do persoal sanitario que se ocupou do seu coidado durante os últimos días, mentres se escoitaba de fondo a canción do Dúo Dinámico que xa se converteu en todo un himno: ‘Resistiré’.
“Eu non merezo tanta atención“, espetou sor Trini ante as continuas mostras de agarimo, tal como recolleu o diario El Progreso de Lugo. EFE
