O Club Deportivo Lugo xogará un partido amigable contra o Real Racing Club de Santander no estadio municipal de Miramar (Luanco, Asturias) o venres 27 de xullo dende as 19 horas, segundo anunciou o club santanderino.
É o terceiro encontro de preparación dos lucenses anunciado até o momento. O Lugo tamén xogará contra o Real Oviedo en Burela o mércores 1 de agosto e contra o R.C. Deportivo da Coruña o mércores 8 de agosto no estadio Ángel Carro a partir das 20:30 horas.
Por outra banda, o club continúa coa súa intención de expandirse socialmente pola provincia na campaña de abonados “A unión fai forza”. Visitará a Praza da Constitución de Vilalba o martes 3 de xullo e a Praza de Galicia de Chantada o xoves 5 de xullo. O horario de ambas visitas será de 10:30 a 15 horas. Realizarán máis visitas pola provincia de Lugo durante os meses de xullo e agosto.
