EFE | O grupo municipal do Partido Popular propón dedicar unha rúa na cidade de Lugo a todos os “heroes” que están a loitar contra o coronavirus e a todas aquelas persoas que co seu esforzo persoal están a permitir que todos os demais poidan manter o confinamento decretado no estado de alarma.

Para recoñecer ese papel que están a desempeñar moitos colectivos e persoas anónimas na cidade, o PP ofrece outras alternativas como “colocar unha placa conmemorativa nun lugar emblemático, un recital ou ben celebrar unha misa polos falecidos e polos profesionais que nos axudaron a saír desta pandemia”.

O grupo municipal anunciou que instará o goberno local, “cando todo volva á normalidade, “a acordar co resto de partidos da corporación un recoñecemento ás vítimas que se está cobrando no municipio esta crise sanitaria”. Un acto, precisa tamén o portavoz do grupo municipal, Ramón Carballo, que “visibilice o papel dos sanitarios, traballadores de residencias da terceira idade, exército español, corpos e forzas de seguridade, persoal de limpeza, transportistas, sector da alimentación e medios de comunicación“.

Ramón Carballo apela ao diálogo e pide ao goberno local que “deixe de lado a súa actitude de impoñer medidas unilaterais sen contar coa opinión do grupo maioritario da corporación, dado que neste tipo de homenaxes non teñen cabida intereses partidistas”.