A Sección Segunda da Audiencia Provincial de Lugo condenou a un axente da Garda Civil a catro anos e sete meses de cárcere e a outros seis anos de inhabilitación por delitos de malos tratos, violencia habitual e ameazas continuadas contra a súa parella.
Diso informou o Tribunal Superior de Xustiza de Galicia (TSXG), que explica que a audiencia, que tamén condena ao home por un delito de descubrimento e revelación de segredos, tivo en conta á hora de ditar a pena a agravante de parentesco e as atenuantes de reparación do dano e de dilacións indebidas.
Ademais, tamén se lle impuxo seis anos de privación do dereito á tenencia e porte de armas e a prohibición de comunicarse por calquera medio e aproximarse á vítima durante doce anos.
OS FEITOS
Na sentenza, os maxistrados indican que o acusado e a denunciante mantiveron unha relación sentimental que durou meses ata finais de setembro de 2015. Precisamente, antes desa data e durante unha discusión que tivo lugar no interior dun vehículo oficial, o home tiroulle do pelo e propinoulle unha puñada na perna esquerda á muller que, por mor da agresión, decidiu pór fin á relación.
Os xuíces destacan que, desde a ruptura, o acusado envioulle múltiples mensaxes ao seu móbil “con ánimo de infundirle medo”. Ademais, apuntan que, desde o 17 de xullo de 2015 ata o 16 de xullo de 2016, utilizou as bases de datos da Garda Civil para obter información persoal da afectada.
O tribunal subliña que á Garda Civil non lle consta que a denunciante “estea ou estivese relacionada en investigación policial ou xestión algunha que xustifique as consultas efectuadas” e destaca que os datos aos cales tivo acceso o acusado son “reservados de carácter persoal”.
O garda civil acusado de maltratar a súa parella nega os feitos durante o xuízo
