- Advertisement -
A área sanitaria de Lugo contabiliza 289 positivos por coronavirus, 45 máis ca os rexistrados no día de onte, segundo datos da Consellería de Sanidade. Ata o momento, producíronse sete mortes na provincia, tras o domingo negro no que faleceron tres persoas no Hospital Universitario Lucus Augusti.
En Lugo permanecen na UCI 11 doentes, dous máis ca onte. Mentres, o número de hospitalizacións sitúase en 57 (catorce na Mariña, sete en Monforte, 1 nos Ollos Grandes e os demais no HULA). Os outros enfermos atópanse no seu domicilio.
RESTO DE GALICIA
A Dirección Xeral de Saúde Pública da Consellería de Sanidade tamén informa de que os casos activos en Galicia ascenden a 3.476, con 168 altas e 79 falecementos. Do total de pacientes, 807 son da área da Coruña, 479 da de Ourense, 348 da de Pontevedra, 866 da área de Vigo, 529 da de Santiago, e 158 da de Ferrol.
