EFE.- Traballadoras do Servizo de Axuda no Fogar (SAF) do Concello de Lugo aseguran que un centenar de usuarios, dun total de seiscentos, se deron de baixa de forma voluntaria nos últimos días por medo a que as persoas que se ocupan da súa asistencia poidan transmitirlles o coronavirus.
Unha desas traballadoras precisou a EFE que os usuarios son conscientes de que elas son “das poucas persoas que veñen da rúa” e que “entran logo nas súas casas”, de modo que teñen medo de que sexan un potencial foco de transmisión do coronavirus. Máis aínda porque se decatan de que as asistentas “carecen dos medios” de protección adecuados.
“Eles son o principal grupo de risco e nós podemos ser un foco de transmisión estupendo se non traballamos cos medios adecuados”, explicou, polo que á vista das circunstancias “prefiren non arriscarse”.
“HABÍA QUE IR COA MESMA MÁSCARA DUNHA CASA A OUTRA”
Outra traballadora denunciou, precisamente, a escaseza de medios coa que traballaron nos últimos días, dado que “cando comezou esta situación, o estado de alarma, déusenos unha máscara a cada traballador, unha caixa de luvas e dous dedos de xel hidroalcólico, nin sequera batas”. “Había que ir coa mesma máscara dunha casa a outra”, lamentou.
Agora, segundo explicaron ambas, están a ser repartidas “3.000 batas”, pero lembran que aínda quedan 500 usuarios e un total de 170 traballadoras, polo que “botando contas”, chegarán para moi poucos días.
O CONCELLO MERCOU BATAS
Pola súa banda, a edila de Benestar Social, Olga López, lembrou que o Servizo de Axuda no Fogar é un “servizo externalizado, que corre a cargo da empresa licitadora”, responsable de “facilitar todos aqueles equipos que as traballadoras poidan necesitar”.
“É certo que vivimos unha situación conxuntural moi complexa, na que é moi difícil conseguir equipos de protección adecuados, como todos desexariamos. Mesmo para a mesma empresa, porque así me consta”, subliñou.
En todo caso, asegurou que o Concello de Lugo comprou as batas dispoñibles no mercado “para protexer os usuarios e as traballadoras”. “Dispoñen de varias batas. Poden deixar unha bata en cada domicilio. Desde o Concello de Lugo o que queremos trasladarlles aos usuarios é que imos poñer todo aquilo que estea na nosa man, sexa ou non responsabilidade nosa, para garantir a súa saúde e, por suposto, das traballadoras”, concluíu Olga López.
