EFE.- O servizo de Medicina Interna do Hospital Universitario Lucus Augusti (HULA) vén de conseguir o selo de ‘Excelente’, que concede a Sociedade Española de Medicina Interna (SEMI) e que na actualidade só teñen dezaoito unidades hospitalarias en toda España, segundo informou o Sergas.
Este selo ‘SEMI-Excelente’ é un sistema de acreditación da calidade das unidades e servizos de Medicina Interna de todo o Sistema Nacional de Saúde, co que se recoñece o bo nivel da asistencia aos pacientes. Para a súa concesión valóranse aspectos como a redución da mortalidade e dos reingresos hospitalarios evitables, entre outros.
O Sergas destacou que “coa concesión deste selo de calidade, a Sociedade Española de Medicina Interna recoñece a excelencia no desempeño das súas funcións de todo o persoal do servizo de Medicina Interna do HULA”. Entenden que valoran o feito de “transcender a actividade asistencial clásica, profundar en áreas como a investigación e a docencia e cumprir con excelencia os criterios de calidade asistencial establecidos pola sociedade científica”, indica o Sergas. Ademais valora a súa capacidade de “innovación” en materia “organizativa e asistencial”.
