A plataforma ‘Galicia Baleira’, que compoñen a Federación de Asociacións de Veciños de Lugo, e a Federación Limiar de Ourense, integráronse na da ‘España Vaciada’.
Así o comunicou o presidente da de Lugo, Jesús Vázquez, durante un encontro que mantiveron representantes de ambas as asociacións coa alcaldesa, Lara Méndez no Consistorio, e na que tamén anunciou que en breve visitará a cidade unha representación do colectivo ‘Teruel Existe’ con máis de vinte anos de “experiencia” e que colabora coa da ‘España Vaciada’.
Vázquez resumiu que “o diagnóstico está claro: estamos a perder poboación, cada vez somos menos e cada vez somos máis vellos“. “Necesitamos servizos e imos adiantar vinte medidas para asentar poboación no rural”, sinalou, a continuación.
En concreto, apuntou que unha das medidas polas que traballarán consiste en “incentivar a aquelas persoas que queren vivir no interior”, copiando o que está a facer Goberno portugués. Así, avanzou que demandarán “incentivos fiscais”.
E é que, ao seu modo de ver, “non ten sentido que, por exemplo, un autónomo do rural pague exactamente o mesmo que un autónomo do centro da cidade, ou da Castellana (Madrid)”. Outro aspecto que non pasa desapercibido para a nova plataforma é a necesidade de “implementar” servizos no rural.
“AXUNTAR ESFORZOS”
A alcaldesa de Lugo, Lara Méndez, apelou á necesidade de “axuntar esforzos e forzas por esa Galicia baleirada, por ese rural galego e no Concello de Lugo tampouco somos alleos porque de 330 quilómetros que ten o noso concello máis do 80 por cento é zona rural”.
Pola súa banda, o presidente da Asociación Limiar de Ourense, Manuel Mosquera, referiuse á importancia do termalismo. “E as políticas que se están facendo co termalismo non son reais, está a gastarse moito diñeiro pero non son medidas reais. A ver si nos centramos un pouquiño e deixamos de xogar a políticos e facemos proxectos reais, e logo tamén infraestruturas e servizos”, reivindicou.
Tamén se reuniron coa subdelegada do Goberno, Isabel Rodríguez, e co presidente da Deputación de Lugo, José Tomé.
