O presidente e a vicepresidenta da Deputación de Lugo, José Tomé e Maite Ferreiro, respectivamente, compareceron este venres en rolda de prensa para informar que os 19 traballadores adscritos a Suplusa pasarán ao persoal de Tragsa, sen que os seus “dereitos salariais ou laborais se vexan afectados”, porque se moverán dunha empresa pública a outra.
En 2018, a Sociedade Urbanística Provincial (Suplusa), que se ocupaba da promoción das residencias da terceira idade, desenvolvemento de chan industrial e mantemento de zonas verdes, perdeu a súa condición como “medio propio da Deputación”, de modo que deixou de ser “útil á Deputación e á provincia”, explicou Tomé.
En todo caso, para cumprir o compromiso de manter os postos de traballo, a Deputación comprou unha acción -por un importe de 8.225 euros- da empresa pública Tragsa, de modo que pasa a ser “medio propio” da institución e ocuparase, a partir de principios de ano, do mantemento das zonas verdes que leva a institución na provincia.
Por tanto, aclarou Tomé, “non se producirá ningunha privatización” do servizo e os empregados terán “o mesmo status laboral”, dado que no encargo de mantemento das zonas verdes vai incluída “a subrogación” do persoal.
En canto ao proceso de liquidación de Suplusa, Tomé calcula que quedará definitivamente completado nun prazo de dous a tres anos. EFE
