A titular do Xulgado de Instrución número 2 de Lugo, Sandra Piñeiro Vilas, mostrouse partidaria de ampliar o número de xulgados especializados en violencia de xénero en Galicia, que, na actualidade, funcionan só nas cidades da Coruña e Vigo.
“Deféndoo e a Lei Orgánica do Poder Xudicial prevía a posibilidade de comarcalización de xulgados de violencia para concentrar recursos”, lembrou, en declaracións aos xornalistas, ao ser preguntada por esta cuestión antes de participar no acto ‘Mullericidio e lei’, organizado na Casa-Museo Emilia Pardo Bazán no Día Internacional da Eliminación da Violencia contra a Muller.
En materia de loita contra a violencia de xénero, a xuíza subliñou que España é “un referente internacional”. Con todo, admitiu que as vítimas, a pesar de requirir, polas súas particularidades, “un tempo e unha atención”, ven “moitas veces afectadas pola carencia de medios”.
“En Galicia só hai dous xulgados especializados, un en Vigo e outro na Coruña, o resto –de asuntos de violencia de xénero– son tratados por xulgados de instrución que levan todo tipo de asuntos”, lembrou.
E aínda que remarcou que a aplicación da lei “é igual por parte de todos os tribunais”, considerou necesario “un incremento nos medios persoais e materiais“.
Sobre estes medios, admitiu, no entanto, que se están facendo “esforzos”. Neste sentido, destacou a incorporación de psicólogas para atender ás vítimas, “que é fundamental para ter un apoio na práctica de dilixencias”, subliñou.
